بصوا بقى انا دة حصل لواحدة انا اعرفها وهى كانت بتحكى وتقول :.....
بصو بقه انا امبارح كنت انا وماما بنشترى شوية حاجات ودخلنا مول كده بتاع ملابس
ف واحنا داخلين لقينا واحده ست كده ماسكه فى اديها ورقه وقولنالها سلام عليكو وخلاص ملفتتش نظرنا ووقفنا بره المول نتفرج من بره ونقول لبعض شوفى دى طب شوفتى دى لا دى احلى لا لا دى اشيك .
فثوانى لقيت الست دى جمبنا واقفه وواحد معدى قالتله والنبى يا ابنى خد اقرالى الجواب ده
قلها هاتى يا حجه عينى دا انت تؤمرينى
وهى الله يخليك يا ابنى كتر خيرك
وفتح الجواب
وببص عليه لقيته عامل كده
والست صاحبه الجواب عماله تقوله في ايه يا ابنى وهو مبيردش عليها
ومركز اوى فى الجواب وعمال يعمل كده
تؤ تؤ تؤ تؤ تؤ تؤ ويسكت ويركز فى الورقه ( تقولى شايف مصيبه حصلت )
والست تقوله فى ايه يا ابنى طمنى
وهو ميردش عليها
المهم انا وماما سيبنا الفرجه على الملابس وانتبهنا ليهم عشان الست منهاره جدا وقلقانه اوى
راحت ماما قالتلها متقلقيش يا حبيبتى ان شاء الله خير
فانا قولتله طيب اقرالها وطمنها حرام كده دى متوتره جدا
مردش عليا وبرده بيعمل كده
تؤ تؤ تؤ تؤ تؤ تؤ تؤ
الله
انا بقه : هو فى ايه
الحجه قالتله اتكلم يا ابنى
اصوت يا ابنى ؟
طب اعيط يا ابنى ؟
اصوت يا ابنى ؟ وفعلا عيطت والله من التوتر اللى الواد عملهولها
قولتله ممكن لو سمحت تدينى الجواب ده
قالى ثوانى بس ثوانى قولت فى بالى دا الواد ده بيقرا مصيبه( يارب استر )
وانا على اخرى منه من الاخر ونفسى اضربه والست يا عينى خلاص هترقعلنا بالصوت فى المول من قلقها
وانا مستغربه جدا طبعا وبقول مبنطقش ليه الواد ده دا اكيد الجواب ده الله لا يقدر فيه مصيبه
الست تانى بتقوله اصوت يا ابنى ؟ قلها صوتى يا حجه وخدى راحتك على الاخر
ربنا يسترها يا حجه ربنا يسترها
راحت الست واخده منه الجواب وادتهولى وهى بترتعش وقريته وقولتلها اللى مكتوب فيه
فيما معناه يعنى انه سلامات من ابنها وبيتطمن عليها وكده وبيقولها انه جاى فى شهر اغسطس من الكويت ومش راجع للسفر تانى وهيقيم معاها فى مصر بعد كده
وطبعا بقراهلها والراجل واقف
والست تقولى والنبى يا بنتى ده المكتوب
اقولها اه والله يا حجه
تسألنى تانى والنبى يا بنتى انتى مبتضحكيش عليا عشان تطمنينى ؟
اقولها والله يا حجه زى ما مكتوب قريتلك ولو تحبى خلى حد تانى يقراهولك وانتى تتاكدى متخافيش والله يا حجه خير مفيش حاجه
راح الواد اللى كان بيقرالها الجواب الاول واقف بيضحك موت
راحت الست صاحبه الجواب بتقوله سيبت اعصابى يا ابنى
انا قولت ابنى مات ولا جراله حاجه
قلها لا والله يا حجه اصلى مبعرفش اقرى اصلا
قالتله وتقولى صوتى يا حجه وخدى راحتك
يا ابن ال ................
هه
وراحت الست قالعه الشبشب وطارت وراه فى المول وسايبه الجواب فى ايدى وماما بقت واقفه جمبى هتقع من الضحك
ه
ورجعت الست دى باستنى وخدت منى الجواب ودعتلى كام دعوه كده حلوه ربنا يجعلها من نصيبى
بس كان موقف كوميدى اوى والله موتنا من الضحك
حبيت بس احكيلكو قولت يمكن تضحكو